السلام عليكم
ايه رايكم واحنا قاعدين سوا كده تتخيلوا لحظه معايا كله يغمض عينه ونتخيل..... لا استنوا افتحوا امال هتقروا ازاي؟
تخيل انك تكون قاعد بالبيت بتتفرج علي فيديو كليب او بتكلم الحب الحب بالتليفون او قاعد قدام شاشه نت و....ماعلينا بقا
فجاءه
جرس الباب بيرن قمت تجري تبص من العين السحريه طبعا عندك عين سحريه يا خبر عارفين مين......
ده وجه مشرق بينور
ده الرسول الكريم عليه افضل الصلاه والسلام
فرحت انه جاي يزورك طبعا .. افتكرت التليفون والحب جريت تقفل معاها يووووووه الغرفه مليانه بوسترات لتامر وريكي ومارتن ونانسي اجري الحق شيلهم..اخ والشرايط الي علي المكتب حفظتها اكتر من القران..المهم بقيت ترمي فيهم وتشيل بسرعه خايف تتاخر علي الرسول ويمشي .....استني استني التليفزيون كمان شغال اجري اقفله ولا لو كنتي بنت بصيتي لنفسك وقلتي ازاي افتح للرسول وانا بالبنطلون وكيلو الميك اب ده روحي ظبطي نفسك
جرينا فتحنا كان الرسول خلاص هيمشي ولما دخلناه سمع صوت موبايلك بيرن.شفت الاسم..........امممم ارتبكت لا وايه رنه مخصوص اطبطب وادلع وحاجه كده كنسلت بسرعه ليسالك ده مين؟
اخ ......يا خبر ريحه السجاير ملت الغرفه الي نسيت تطفيها هنفتح الشباك يهوي
المؤذن بياذن طبعا هنزل اصلي النهارده مخصوص الجامع ده الرسول يا اخوانا ........
بس دي مجامله ولا احنا بنصلي بالجامع علطول
طيب هخشع ولا ده صعب مع عصر السرعه اليومين دول؟
تخيلت؟؟؟
ساعتها الرسول حبيبك زعل مش بس كده ده بكي من الي شافه وسالك؟
انت الي ضحيت بعمري من اجله؟
انتي حفيده فاطمه وعائشه؟
هل وصلتك رسالتي وادرت لها ظهرك؟
كيف تطلب شفاعتي وانت اهملت سنتي؟
يا حلاوه ...امال لو نزل الجامعه وشاف بعينه ولو سالك اخر مره قريت قران كانت امتا؟ولا اخر مره صليت قيام الليل؟ ............ياخبر
طيب حلو جميل
تخيل بقا لو الي زارك مش الرسول طب مين يا تري ؟؟!!!!
اسمع ده ملك الموت جه يزورك وده هيزورك هيزورك اكيد مش تخيل ومن غير استئذان ولا عين سحريه ولا مهله ولا حنيه ساعتها هتعمل ايه؟
دخلت القبر وشفت ظلمته وحسيت بضمته ياتري عملت حساب ليوم زي ده؟
تصالح مع نفسك وتمني ان يزورك الاول(الرسول الكريم)بفرحته قبل ان يزورك الثاني(ملك الموت)بقبضته
اخر كلامي
اللهم قنا شرور انفسنا وسيئات اعمالنا واجعل خير اعمالنا خواتيمها
وميرسي لتخيلكم
والي لقاء لتخيل اخر
الأربعاء أبريل 02, 2008 6:42 pm
